Doganierët e vendkalimit kufitar Tabanovcë gjatë fundjavës së kaluar kanë konfiskuar rreth 20 mijë euro, të cilat një shtetas i Maqedonisë ka dashur t’i fusë ilegalisht në vend. Valuta e padeklaruar u zbulua gjatë kontrollit të detajuar në mjetin me të cilin udhëtonte personi.Më 22 tetor, shtetasi i Maqedonisë i cili drejtonte veturën me targa suedeze, në hyrje të vendit deklaroi se me vete kishte vetëm rreth 10.000 euro, edhepse gjithsej ishin 29.950 euro. Për shkak të dyshimeve, doganierët kanë kryer kontroll të detajuar dhe kanë zbuluar një sasi të madhe valutore pas mburojës së diellit te drejtuesi veturës dhe në hapësirën midis sediljeve të përparme, të cilat personi nuk i ka deklaruar si dhe nuk dispononte dokument për to.Sipas Ligjit për punë devizore, pasagjerit i janë kthyer 10 mijë euro, ndërsa 19.950 euro të mbetura janë mbajtur përkohësisht dhe sipas rregullores do t’i dorëzohen Bankës Popullore. Ndaj personit është bërë kallëzim për kundërvajtje në valutë.
Njoftojmë se në çdo hyrje në vend, udhëtarët lirisht mund të sjellin deviza deri në 10.000 euro për person. Nëse futen para të huaja efektive – devizë mbi 10.000 euro, personat janë të detyruar t’i deklarojnë në organin doganor.