Gërvalla dhe Prévot diskutojnë thellimin e bashkëpunimit ndërmjet Kosovës dhe Belgjikës

Ministrja në detyrë e Punëve të Jashtme dhe Diasporës së Kosovës, Donika Gërvalla, ka zhvilluar një takim me ministrin e Jashtëm të Belgjikës, Maxime Prévot, ku theksuan miqësinë dhe partneritetin e qëndrueshëm ndërmjet dy vendeve. Gërvalla e falënderoi Belgjikën për mbështetje të vazhdueshme në procesin e shtetndërtimit të Kosovës dhe për rolin e saj të rëndësishëm në forcimin e pozitës ndërkombëtare të Kosovës.

Në këtë takim, të dy ministrat diskutuan mundësitë për thellimin e bashkëpunimit në fusha kyçe si drejtësia, arsimi, kultura dhe ekonomia, si dhe për mbështetje të mëtejshme të Belgjikës në avancimin e Kosovës në organizata ndërkombëtare, përfshirë anëtarësimin në Këshillin e Evropës. Gërvalla gjithashtu theksoi rëndësinë e trajtimit të barabartë të Kosovës në forumet evropiane dhe nevojën për mbështetje konkrete që ndihmojnë integrimin e Kosovës në familjen evropiane.

Në përmbyllje, ajo vlerësoi kontributin e diasporës kosovare në Belgjikë për forcimin e lidhjeve dypalëshe dhe theksoi potencialin e madh për realizimin e projekteve të përbashkëta kulturore, arsimore dhe zhvillimore. Gërvalla shprehu angazhimin e Kosovës ndaj vlerave evropiane dhe euroatlantike, duke theksuar se Belgjika është një aleate e çmuar në këtë rrugëtim të përbashkët.