Gjermania dhe Austria ndalojnë hyrjen e Milorad Dodikut

Gjermania dhe Austria kanë vendosur ndalim hyrjeje për liderin e serbëve të Bosnjës, Milorad Dodik. Kjo masë vlen edhe për dy politikanë të tjerë nga Republika Srpska, Nenad Stevandić dhe Radovan Višković, njoftoi ministrja e Jashtme e Austrisë, Beate Meinl-Reisinger, gjatë vizitës së saj në Sarajevë.

Meinl-Reisinger po qëndron në Sarajevë deri të premten dhe do të takohet me ministrin e Jashtëm të Bosnjës dhe Hercegovinës, Elmedin Konaković, si dhe me përfaqësuesin e lartë ndërkombëtar, Christian Schmidt. Ajo gjithashtu do të vizitojë trupat e EUFOR-it në kampin Butmir.

Ndërkohë, policia kufitare e Bosnjës dhe Hercegovinës po heton mënyrën se si Dodik kaloi kufirin, pavarësisht se ndaj tij kishte një urdhër arresti të brendshëm. Ka dyshime se delegacioni i tij ka kaluar pikën kufitare Racha pa ndaluar. Përkundër kërkesës së Gjykatës së Bosnjës për një urdhër arresti ndërkombëtar ndaj Dodikut dhe Stevandićit, Interpoli e refuzoi këtë kërkesë. Dodik më pas udhëtoi drejt Izraelit dhe Moskës.