Haradinaj nga Gllogjani: Lufta e UÇK-së forcoi aleancën tonë me NATO-n dhe SHBA-në
Kryetari i Aleancës për Ardhmërinë e Kosovës, Ramush Haradinaj, ka marrë pjesë sot në ceremoninë përkujtimore në Gllogjan, ku janë nderuar dëshmorët Arben dhe Luan Qerimaj, në përvjetorin e rënies së tyre.
Në fjalën drejtuar të pranishmëve, Haradinaj theksoi se ky përvjetor është një kujtesë e fortë për sakrificat e brezit të luftës dhe për qëndrueshmërinë e idealeve që sollën lirinë e Kosovës. Ai përkujtoi edhe bashkëluftëtarët e rënë në të njëjtën ditë: Rexhep Tafaj, Ekrem Berisha, Fetah Selca, Beslim Alijaj dhe Haki Krasniqi, duke i quajtur “figura të paharrueshme të rezistencës shqiptare”.
“Të gjithë ishin luftëtarë të guximshëm që sakrifikuan gjithçka për atdheun. Kujtimi për ta është frymëzim i përhershëm për brezat që vijnë,” tha Haradinaj.
Ai nënvizoi se liria e Kosovës u arrit përmes përpjekjeve të mëdha të Ushtrisë Çlirimtare të Kosovës, e cila, sipas tij, shtriu themelin e bashkëpunimit strategjik me NATO-n dhe me Shtetet e Bashkuara të Amerikës.
“Lufta jonë çlirimtare jo vetëm që solli lirinë, por edhe hapjen e një kapitulli të ri – atë të aleancës sonë me Perëndimin, e veçanërisht me Amerikën. Kjo aleancë është vlera jonë më e madhe dhe duhet ruajtur me përgjegjësi,” u shpreh ai.
Në përmbyllje, Haradinaj ritheksoi vizionin e tij për një Kosovë të angazhuar aktivisht në sigurinë globale dhe të integruar plotësisht në NATO, duke theksuar se rrugëtimi drejt kësaj synimi vazhdon me përkushtim.
