Kryetari Kasami dhe drejtori i NPK “Sharri” në vizitë zyrtare në Austri, takim me kompaninë ndërkombëtare të ujësjellësit ÖSTAP

Kryetari i Komunës së Tetovës, Bilall Kasami, së bashku me drejtorin e NPK “Sharri”, Valon Zeqiri, kanë nisur vizitën zyrtare në Austri me një takim të rëndësishëm në selinë e kompanisë ndërkombëtare të ujësjellësit ÖSTAP, e cila operon në shumë vende të botës, përfshirë edhe Ballkanin.

Gjatë takimit u diskutua mbi mundësitë konkrete për bashkëpunim dhe investime në qytetin e Tetovës. U theksua rëndësia e eksperiencës së kompanisë ÖSTAP në ofrimin e zgjidhjeve moderne për furnizim të qëndrueshëm me ujë të pijshëm.

“Kemi nisur procesin e vendosjes së ujëmatësve, kemi shtrirë rrjetin e ujësjellësit dhe jemi të përkushtuar që qyteti ynë të ketë 24 orë ujë të pijshëm. Përvoja e kompanisë ÖSTAP është një model për ne dhe bashkëpunimi me ta ka vlerë të madhe për Tetovën,” u shpreh kryetari Kasami.

Palët u dakorduan që bashkëpunimi të vazhdojë edhe në të ardhmen, përmes vizitave të ndërsjella dhe projekteve konkrete në qytetin e Tetovës.

Kryetari Kasami gjithashtu theksoi se falë menaxhimit të përgjegjshëm, punonjësit e ndërmarrjes NPK “Sharri” sot marrin rregullisht pagat e tyre, ndryshe nga e kaluara kur ndërmarrja përballej me borxhe dhe paga të prapambetura.

“Ne nuk heshtim përballë vështirësive. Vazhdojmë të punojmë çdo ditë për një Tetovë të zhvilluar dhe moderne,” përfundoi kryetari Kasami.