Kurti sfidon opozitën: Votoni Albulena Haxhiun, më testoni nëse kam 61 vota për mandatin e tretë

Kryeministri në detyrë, Albin Kurti, në një intervistë për Radio Televizionin e Kosovës (RTK), ka sfiduar opozitën duke e ftuar ta testojë nëse e ka shumicën parlamentare për të marrë mandatin e tretë si kryeministër.

Ai ka thënë se një mënyrë për ta bërë këtë është përmes votimit të Albulena Haxhiut si kryetare e Kuvendit të Kosovës.

“Tash kolegët e mi në Kuvendin e Republikës që udhëheqin subjektet e tyre, ata nuk besojnë se unë i kam 61 vota për kryeministër. Unë u them atyre më testoni. Le ta votojnë Albulenën dhe le të më testojnë mua. Nëse unë dështoj, pikërisht kjo do të ishte fitore për ta”, deklaroi Kurti.

Kryeministri në detyrë kritikoi edhe mënyrën si po vepron opozita, të cilën e akuzoi për bllokim të procesit parlamentar dhe pamundësim të kuorumit.

Sipas Kurtit, nëse opozita me të vërtetë synon ndryshim qeverisjeje, atëherë do duhej të lejonte votimin e organeve të Kuvendit për të hapur rrugën drejt testimit të shumicës parlamentare.

“Kam filluar të mendoj se opozita ka një dëshirë të fshehtë që unë të mbetem kryeministër. Nëse duan të më largojnë, atëherë le ta votojnë Albulenën. Përndryshe, do të thotë se janë të kënaqur me këtë qeveri, në mënyrë latente”, shtoi Kurti.

Deklaratat e Kurtit vijnë në kohën kur Kuvendi ende nuk ka arritur të konstituohet pas zgjedhjeve të fundit, për shkak të mungesës së marrëveshjes për zgjedhjen e kryetarit të Kuvendit dhe organeve të tjera.