Kohanews

Ke Çfarë Lexon!

Nënshkruhen protokolet për implementimin e “One stop shop” në Tabanocë

2 min read
Loading...

Me qëllim të përmirësimit të lëvizjes së qytetarëve dhe të tregtisë dhe të lehtësimit të komunikacionit përmes kufirit shtetëror ndërmjet Republikës së Maqedonisë së Veriut dhe Republikës së Serbisë, sot në Shkup u nënshkruan protokole të veçanta për implementimin e Marrëveshjes për vendosjen e kontrollimeve të përbashkëta në pikën kufitare për komunikacion ndërkombëtar rrugor Tabanocë (Republika e Maqedonisë së Veriut)- Preshevë (Republika e Serbisë), ndëmjet institucioneve kompetente të RMV-së dhe të R. së Serbisë. Nënshkrimi i sotëm i protokoleve vijon pas nënshkrimit të Marrëveshjes ndërmjet dy Qeverive të Republikës së Maqedonisë së Veriut dhe të Republikës së Serbisë në Beograd më 12 korrik për vendosjen e kontrollimeve të përbashkëta në pikë kalimin kufitar ndërkombëtar rrugor Tabanocë-Preshevë nga ana e ministrit Oliver Spasovski dhe kolegut të tij serb Nebojsha Stefanoviq.

 

Në nënshkrimin e sotëm të protokoleve delegacionet i udhëhiqnin sekretarët shtetëror të dy ministrive: mr. magdalena Nestorovska dhe mr. Milosav Miliçkoviq.

 

“One stop shop është projekt për të cilin jemi krenar dhe sinqerisht shpresoj se ky do të jetë shembull i  mirë për të gjitha shtetet e rajonit. Nënshkrimi i protokoleve për zbatimin e Marrëveshjes ndërmjet Qeverisë së Republikës së Maqedonisë së Veriut dhe të Qeverisë së Republikës së Serbisë për kontrollime të përbashkëta në pikën kufitare për komunikacion ndërkombëtar rrugor është dëshmi se me forca të përbashkëta, bashkëpunim dhe me kyçjen e institucioneve në fund do të rezultojnë me sukses i cili do të jetë në dobi të qytetarëve të të dy shteteve”, tha mr Nestorovska në prononcimin e saj.

Drejtori i Drejtorisë së Doganave Gjoko Tanaskovski shprehu kënaqësinë nga nënshkrimi i protokoleve, duke potencuar se bashkëpunimi më i afërt ndërmjet dy institucioneve  do të rezultojë me zbulimin më të suksesshëm të aktiviteteve ilegale tejkufitare, dhe me këtë rritet edhe siguria.

Sekretari shtetëror Miliçkoviq tha se pika kufitare Preshevë-Tabanocë është një nga kalimet më frekuente, posaçërisht gjatë verës kur shumë qytetarë të Republikës së Serbisë drejtohen për në Greqi, kështu që me “One stop shop” në masë të madhe do të zvogëlohet pritja në këtë pikë kalim kufitar.

“Nga vendosja e kontrollimeve të përbashkëta dobi të drejtpërdrejt do të kenë qytetarët e Serbisë dhe të Maqedonisë së Veriut. Ky është një tregues i qartë se udhëheqësitë e të dy vendeve sjellin vendime për problemet e përditshme të qytetarëve”, tha Miliçkoviq.

Pas përfundimit të formaliteteve tjera, së shpejti do të fillojë të funksionojë “One stop shop” në PK Tabanocë-Preshevë.