Lamtumirë, Margarita Xhepa – Ikona e Kinematografisë Shqiptare
Aktorja e njohur shqiptare, Margarita Xhepa, është ndarë nga jeta në moshën 91-vjeçare, vetëm një ditë pas ditëlindjes së saj. Prej kohësh vuante nga problemet me mushkëritë, ndërsa lajmin e trishtë e konfirmoi i biri, aktori Ndriçim Xhepa.
Me një karrierë mbi 50-vjeçare, Xhepa interpretoi mbi 150 role në teatër dhe 32 role në kinematografi, duke sjellë në jetë personazhe të paharrueshme. Ajo u vlerësua me tituj të lartë si “Artiste e Popullit” dhe “Nderi i Kombit”, duke mbetur një figurë e pavdekshme e artit shqiptar.
Nga Ofelia në “Hamleti” te pianistja në “Koncert në vitin 1936”, Margarita Xhepa spikati me talentin dhe emocionin që përcolli në çdo rol. Kontributi i saj në teatër dhe kinematografi do të mbetet një pasuri e çmuar për brezat e ardhshëm.
