Manchester City dhe Chelsea interesohen për Tijjani Reijnders, Milan mund ta shesë për mbi 70 milionë euro
Tijjani Reijnders po tërheq vëmendjen e madhe në futbollin europian këtë sezon me 15 gola dhe 5 asiste, duke ngjallur interesin e klubeve të mëdha si Manchester City dhe Chelsea, sipas “TuttoMercatoWeb”. Mes shumë sfidave për Milanin këtë sezon, holandezi është shfaqur si një nga lojtarët më të qëndrueshëm dhe liderë në fushë, çka bëri që klubi kuqezi të zgjasë kontratën e tij deri në vitin 2030.
Raportimet tregojnë se Pep Guardiola e sheh Reijnders si pasuesin ideal të Kevin De Bruyne, i cili do të largohet nga City në fund të sezonit si lojtar i lirë. Chelsea gjithashtu e ka në listën e prioritetve për merkato. Edhe pse deri tani nuk ka pasur kontakte konkrete mes City dhe Milanit, pritet që oferta fillestare të kalojë shifrën e 70 milionë eurove, një shumë që do të shënonte shitjen më të shtrenjtë në historinë e Milanit, duke tejkaluar transferimet e Kaká dhe Tonalit.
Sipas burimeve, Milan nuk ka lojtarë të pashitshëm dhe nëse mbërrin oferta e duhur, Reijnders mund të largohet nga “San Siro” këtë verë.
