Maqedonci: Marrëveshja për sigurinë kibernetike me SHBA-në thellon partneritetin strategjik

Ministri në detyrë i Mbrojtjes së Kosovës, Ejup Maqedonci, ka folur për rëndësinë e marrëveshjes së nënshkruar më 13 maj mes Kosovës dhe Shteteve të Bashkuara të Amerikës, që ka të bëjë me ndërveprueshmërinë dhe sigurinë në komunikim. Në një intervistë për emisionin “Balkan Talks”, Maqedonci tha se kjo marrëveshje është një hap i rëndësishëm për thellimin e bashkëpunimit në fushën e mbrojtjes dhe sigurisë.

“Marrëveshja lidhet me ndërveprueshmërinë në aspektin e komunikimit dhe atë kibernetik. Ajo është vazhdimësi e marrëveshjes së vitit 2023 të nënshkruar mes Kryeministrit Albin Kurti dhe ish-ambasadorit amerikan Hovenier,” deklaroi Maqedonci.

Sipas tij, dokumenti i ri i nënshkruar mes gjeneralit Bashkim Jashari dhe zyrtarit amerikan Jon Philips ka vlerë të madhe politike dhe strategjike, pasi përforcon mbrojtjen e informacionit të ndjeshëm, sidomos në përdorimin e sistemeve amerikane brenda Forcës së Sigurisë së Kosovës. Maqedonci theksoi se SHBA-të mbeten partneri kryesor i Kosovës për blerjet ushtarake dhe ndihmën në fushën e sigurisë.