Milano, golat e Iniesta-s frymëzim për Barcelonën para duelit me Interin

Barcelona i shkon mysafire Interit në ndeshjen e kthimit të gjysmëfinales së Ligës së Kampionëve, duel që do të përcaktojë finalistin e parë të edicionit aktual, me finalen e madhe të planifikuar në fund të këtij muaji në Mynih.

Katalanasit nuk arritën të fitojnë në “Montjuïc”, ku ndeshja përfundoi me barazim 3-3, dhe tani do të duhet të triumfojnë në Milano për të siguruar biletën për në “Allianz Arena”. Detyrë aspak e lehtë për skuadrën e drejtuar nga Hansi Flick, por gjithçka mbetet e hapur, pasi rregulli i golit në fushë kundërshtare tashmë nuk është në fuqi.

Legjenda e klubit, Andres Iniesta, që e di shumë mirë çfarë do të thotë të luash dhe të fitosh finale të Ligës së Kampionëve, ka tentuar të motivojë ekipin me një postim emocional.

Ai ka publikuar golin e tij të paharrueshëm ndaj Chelseat në vitin 2009, gol i shënuar në fund të ndeshjes, që i dha Barcelonës kualifikimin për në finalen e Romës, ku më pas ekipi i Guardiolës triumfoi ndaj Manchester United.

“Forca Barcelona, për edhe një finale tjetër”, ka shkruar Don Andres në rrjetet sociale, duke ndarë momentin legjendar ndaj “bluve”.