Kohanews

Ke Çfarë Lexon!

Ai jeton në mua, ai jeton brenda gjithë shqiptarëve!

4 min read
Loading...

Një shkrim me rastin e 20 vjetorit të humbjes së filozofit Ukshin Hoti.

Sot më shumë se kurrë shqiptarët kanë nevojë për filozofinë politike të Ukshin Hotit. Edhe pse sot mbushen 20 vite që ai është larg nesh, gjurmët e tij shkencore do të jenë të paaritshme dhe duhet të përfaqësojnë udhërëfyes për politikën shqiptare. Fatëkeqësisht, filozofi ynë i madh, ai që çdo definim konceptesh politike e lidhi me çështjen shqiptare, sot zëvendësohet me filozofë të cilëve u “çohemi” në këmbë vetëm se nuk flasin shqip, apo nuk e flasin mirë atë.


Babai i kombit tonë, profesori i babait tim, nënvetëdija e çdo shqiptari është Ukshin Hoti me veprimet dhe hulumtimet mbi Filozofinë Politike të Çështjes shqiptare. Sa herë që ky dinamizëm i rrejshëm e kjo lodhje llafesh të kota na bëhet e bezdisshme, ne shqiptarët fatëmirësisht kemi një realitet tjetër, që aspak nuk është i ngjashëm me këtë të sotmin. Realitetin që e dëshiroi, punoi e na e la trashëgimi studiuesi, profesori, politikologu dhe intelektuali i klasit të parë Ukshin Hoti. Ky realitet i dëshiruar e i rregulluar mjeshtërisht prej tij, fillet e veta duhet ti ketë një ditë e më parë. Realiteti i një politike të bazuar në konceptet e definimeve të saja shkencore mbi të cilat ka ecur historia shqiptare dhe duhet të rrugëtojë e ardhmja jonë. Fatëkeqësisht një rrugëtim i këtillë është ndërprerë tashmë shumë vite, prej kur doli shprehja e “tranzicionit”, kuptimi i së cilës ende është i shumëllojshëm e aspak i kapshëm për shqiptarët që kanë kontinuitet e bazament të fuqishëm filozofiko-historik.

Hoti në veprën e rëndësishme “Filozofia politike e çështjes shqiptare”, e cila duhet të jetë në xhepin e çdo shqiptari e sidomos politikani, dhe në mendjen e tij, e vendos çështjen shqiptare si pjesë të pashkëputur të botës. Hoti vendosi me idetë e tij rrugën e ecjes së gjithë shqiptarëve, atë të përafrimit me SHBA-të dhe Europën, parë në konceptin institucional, rrugë për të cilën aktualisht lëvdërohen gjithë politikanët tanë. Në një gjuhë të kuptueshme dhe të drejtpërdrejtë në të vërtetë Hoti zbërtheu problematikat shqiptare dhe përfaqëson udhërëfyes për vendin e shqiptarëve në rajon e në botë. Jo vetëm filozof udhërëfyes, por edhe aktor guximtar i organizimeve politike-kombëtare të viteve 90’, apo organizator i protestave të 81’, apo kundërshtues publik i okupimit jugosllav të viteve 70’. Kështu pra, Ukshin Hoti përfaqëson intelektualin më të lartë shqiptar, dhe veprimtarin më të shquar të çështjes kombëtare, mbi filozofinë dhe veprimin e të cilit mbështetet pjesa më e madhe e kontributit për Pavarësinë e Kosovës, apo do të mbështetet në të ardhmen e gjithë dinamika e zhvillimit kombëtar shqiptar.

Në definimin e tij të konceptit të politikës, dhe ndërlidhjes së saj me moralin, e manifeston edhe realitetin e sotëm politik shqiptar që është i dhimbshëm, sidomos për brezat e rinj. Duke na dhënë një njohuri për gjithë filozofët dhe kohërat filozofike ku hapëron bota, përcakton politikën si nënë të shkencave dhe se ajo duhet së pari të konsiderohet si shkencë e politikës që është në funksion të interesave shoqërore, e që nënkuptohet se nuk është në funksion të interesave personale, partiake apo klanore. Definimn e saj si “arti i së mundshmes”, Hoti nuk e elaboron vetëm në kuptimin pozitiv të fjalës, gjë që nënkuptohet se aplikimi i politikave në realitetin shoqërorë, mund të jetë edhe ai i dinakërisë, pra negative, që është edhe realitet i sotëm tek shqiptarët.
Për filozofin tonë të madh Ukshin Hoti, normalisht kanë folur edhe shumë intelektualë të tjerë, ndërsa Kadare thotë se ndoshta veprimi i tij i madh intelektual bëri që më 16 Maj të vitit 1999 të humbet nga agresorët serbë. Dhe kjo mund të qëndrojë bukur mirë, por edhe pse Ukshin Hoti është në kërkim nga viti 1999, filozofinë e tij, angazhimin praktik, moralin, duhet ta kërkojnë brenda vetes secili nga politikanët shqiptar, sepse Ukshin Hoti, jeton brenda meje, jeton te të gjithë shqiptarët.

Faton Murseli
Doktorant i Sociologjisë Politike
Universiteti i Tetovës