Ministrja shqiptare krah Xhaferit: Do bëhet Shqiptaria edhe për inat të disa shqiptarëve

Ajo ishte pranë Kryeministrit, në momentin kur Edi Rama u spërkat me bojë nga Edi Paloka, madje boja e lëshuar përmes një shiringe nga kreu u grupit parlamentar demokrat preku edhe ministren e Shtetit për Marrëdhënien me Parlamentin.

Incidenti ndodhi sot brenda sallës së Kuvendit, teksa Parlamenti i Shqipërisë ishte mbledhur dhe ratifikoi protokollin e anëtarësimit të Maqedonisë së Veriut në NATO. Në seancë merrte pjesë edhe kryetari i Kuvendit të Maqedonisë, Talat Xhaferi.

Ministrja Elisa Spiropali ka pozuar pas punimeve në Kuvend, me Talat Xhaferin, duke dhënë edhe këtë mesazh, pas incidentit:

“Do bëhet Shqiptaria edhe për inat të disa shqiptarëve. Me Kryetarin e Kuvendit të Maqedonisë së Veriut, Z.Talat Xhaferi.”