Shaqiri për nxënësit: ruani paqen në veten tuaj dhe  mjedisin në të cilin po  rriteni, sepse është  gjë e çmuar

Bëhuni tolerantë, bëhuni korrekt ndaj moshatarëve tuaj, ndihmoni në vend që ta vështirësoni, tallni e sulmoni si dhe ruani qetësinë sikurse në veten tuaj poashtu edhe në shkolla dhe në përgjithësi në mjedisin ku jetoni dhe rriteni sepse është një gjë shumë e çmuar. Kjo është porosia që ministri i Arsimit dhe Shkencës Jeton Shaqiri ua dërgoi  nxënësve të shkollave të mesme, të cilët ishin pjesë e debatit në Fakultetin Filozofik në Shkup kushtuar sigurisë në shkolla.

“Unë besoj në pjekurinë tuaj, në kreativitetin  dhe iniciativën tuaj dhe e di mirë që mund të ofroni shumë që të përforcojmë sistemin e sigurisë në shkolla dhe për të gjetur mënyra për të promovuar dhe përhapur më shumë tolerancën, respektin dhe dashurinë ndërmjet të gjithë të rinjve” u shpreh Shaqiri, duke shtuar se diskutimet e shpeshta dhe debatet e gjera janë mënyra më e mirë për të krijuar ide, masa dhe aktivitete të reja që do të plotësojnë mekanizmin ekzistues institucional për ruajtjen e sigurisë në shkolla dhe për krijimin e mjedisit paqësor.

“Tanimë  të gjithë jeni të njoftuar  me rekomandimet që Qeveria miratoi javën e kaluar, të cilat u propozuan nga Ministria e Arsimit dhe Shkencës, e cila, nga ana tjetër, i krijoi ato përmes një procesi të gjerë konsultativ në të cilin, natyrisht, nxënësit e shkollave të mesme përmes Unionit të tyre dhanë  kontribut të madh dhe në fakt një pjesë e atyre 10-të  rekomandimeve janë propozuar nga kjo organizatë. Kështu që kam arsye të besoj në konstruktivitetin dhe efektivitetin e debatit të sotëm” potencoi ministri i Arsimit dhe Shkencës

Ai theksoi se gjithçka që do të dalë si propozim interesant nga diskutimi mund të gjendet në  seancë qeveritare  dhe të miratohet si shtesë në grupin e masave me të cilat, siç theksoi ai do të përpiqemi  për pranimin e vlerave të vërteta ndërmjet nxënësve ndërmjet juve të rinj që do t’i bëjnë ata njerëz të mirë të cilët më tej do të ndërtojnë  një shoqëri paqësore dhe harmonike.