Shkup, ndryshimet në ligjin për vetëqeverisje lokale hapin rrugën për referendum ndaj kryetarëve të komunave

Qeveria e Maqedonisë së Veriut miratoi sot propozim-ndryshimet në Ligjin për vetëqeverisje lokale, me të cilat parashihen masa të reja për forcimin e demokracisë lokale dhe rritjen e efikasitetit komunal. Ndryshimet përfshijnë mundësinë e referendumit për shkarkimin e kryetarëve të komunave, krijimin e një policie komunale dhe rritje të pjesëmarrjes së sektorit civil në vendimmarrje në nivel lokal.

Propozim-ndryshimet do të kalojnë në procedurë parlamentare dhe nëse miratohen deri në verë, do të zbatohen për kryetarët e rinj që do të zgjidhen në zgjedhjet lokale të tetorit.

Sipas Qeverisë, ndryshimet synojnë të përmirësojnë funksionimin e komunave, transparencën, përfshirjen qytetare dhe efikasitetin administrativ. Një nga risitë më të rëndësishme është mundësia që 20 për qind e qytetarëve të një komune të kërkojnë referendum për shkarkimin e kryetarit të saj.

Ministri i Vetëqeverisjes Lokale, Zlatko Perinski, sqaroi se këto ndryshime nuk do të kenë efekt të prapavijshëm, që do të thotë se kryetarët aktualë nuk mund të shkarkohen me ligjin e ri.

Nga Asociacioni i Njësive të Vetëqeverisjes Lokale (ZELS) përshëndetën kalimin e propozim-ligjit në Qeveri, duke veçuar themelimin e policisë komunale si një kërkesë të kahmotshme të tyre. Ata shprehën shpresë se Kuvendi do ta miratojë sa më shpejt këtë ligj për të mundësuar shërbime më cilësore për qytetarët.