Sekretari i Përgjithshëm i NATO-s, Jens Stoltenberg tha se ai dënon fuqishëm sulmet e fundit ndaj trupave të KFOR-it në veri të Kosovës, në të cilat u plagosën rreth 40 paqeruajtës dhe shtoi se Prishtina dhe Beogradi duhet të ndërmarrin hapa konkretë për të de-përshkallëzuar situatën.
“Sulme të tilla janë të papranueshme dhe duhet të ndalen”, tha Stoltenberg në një intervistë për Pobjeda.
“Po dërgojmë në Kosovë rreth 500 ushtarë të tjerë nga rezerva operative për Ballkanin Perëndimor dhe kemi vënë në gatishmëri më të lartë edhe një batalion rezervë, që edhe ata të dislokohen sipas nevojës. Këta janë hapa parandalues për të siguruar që KFOR-i të ketë forcën dhe aftësitë që i nevojiten për të përmbushur mandatin e tij”, tha ai.