Strugë, Merko – Përfundon marrja në pyetje e dëshmitarëve për rastin “Audi A6”
Në Gjykatën Themelore në Strugë përfundoi marrja në pyetje e dëshmitarëve në procesin gjyqësor kundër kryetarit të komunës, Ramiz Merko, për furnizimin me automjetin “Audi A6”. Dëshmitë e fundit u dhanë nga ish-e punësuara në Entin Shtetëror për Revizion dhe anëtarët e Komisionit për furnizime publike. Seanca e radhës është caktuar për 9 qershor, kur Merko pritet të ofrojë mbrojtjen e tij, ndërsa më pas do të vijojnë fjalët përmbyllëse dhe shpallja e aktvendimit.
Gjykatësi Jordan Jovanov deklaroi se në seancën e fundit u paraqitën dëshmitë verbale dhe materiale, dhe se çështja mund të përmbyllet gjatë muajit qershor. Sipas dëshmisë së pensionistes Liljana Stojanova, në kohën e bllokimit të llogarisë komunale, ishin caktuar mjete për funksionim bazë të komunës. Megjithatë, në nëntor 2017 u lejua një limit mujor prej mbi 50 milionë denarë, duke e tejkaluar buxhetin vjetor të komunës.
Anëtarët e Komisionit për furnizime publike thanë se procedura për blerjen e katër automjeteve, përfshirë edhe “Audi A6”, ishte në përputhje me ligjin dhe se kishte dy oferta në tender. Sipas mbrojtjes së Merkos, nuk ka asnjë provë për parregullsi. Dëshmitarët që kishin munguar më herët, u sollën me polici me urdhër të gjykatës. Sot në të njëjtën gjykatë vazhdoi edhe seanca për vendosjen e pllakës përkujtimore në hyrje të komunës, që është pjesë e një tjetër procesi gjyqësor.
