Suedia ka përmbushur kërkesën e Turqisë për t’u anëtarësuar në NATO, tha të dielën Sekretari i Përgjithshëm i NATO-s Jen Stoltenberg pas takimit me presidentin turk Rexhep Tajip Erdogan në Stamboll.
Stoltenberg tha se Suedia kishte ndryshuar legjislacionin e saj për të adresuar shqetësimet e sigurisë së Turqisë dhe se bisedimet me Turqinë dhe Suedinë do të rifillonin brenda një jave.
Pas pushtimit rus të Ukrainës shkurtin e kaluar, Suedia dhe Finlanda aplikuan për t’u bashkuar me aleancën perëndimore pas dekadash neutraliteti.
Finlanda u pranua si anëtarja e 31-të në prill të këtij viti pasi të gjithë anëtarët e NATO-s ratifikuan kërkesën e saj, por Turqia dhe Hungaria ende nuk e kanë ratifikuar kërkesën e Suedisë.
Turqia e justifikon bllokimin e saj me faktin se Suedia nuk vepron kundër organizatave terroriste, dhe në veçanti me refuzimin e saj për të ekstraduar njerëz që Ankaraja i konsideron terroristë.
Ligjet e reja kundër terrorizmit hynë në fuqi në Suedi të enjten, duke ndaluar pjesëmarrjen, financimin ose mbështetjen e një organizate terroriste.
Udhëheqësit e NATO-s do të mbajnë samitin e tyre vjetor në Vilnius në korrik.
Erdogan siguroi një mandat të ri presidencial në raundin e dytë të zgjedhjeve një javë më parë.
Stoltenberg mori pjesë në ceremoninë e betimit në Ankara të shtunën.