Ish-kryeministri do të japë shpjegime përkatëse në hetimin mbi vdekjen e katër protestuesve
Prokuroria e Posaçme Kundër Korrupsionit dhe Krimit të Organizuar (SPAK) ka ftuar ish-kryeministrin Sali Berisha për t’u pyetur lidhur me ngjarjen tragjike të 21 Janarit 2011. Ai është thirrur për t’u paraqitur të premten në orën 10:00, në cilësinë e personit që mund të japë rrethana të dobishme për hetimin.
Ky është hera e parë që Berisha do të pyetet nga SPAK për ngjarjet ku katër protestues u vranë para Kryeministrisë: Aleks Nika, Ziver Veizi, Faik Myrtaj dhe Hekuran Dedaj.
Më herët, më 30 tetor, Prokuroria kishte marrë në pyetje ish-ministrin e Brendshëm, Lulzim Basha, në lidhje me të njëjtën ngjarje.
Hetimi i SPAK për ngjarjen e 21 Janarit nisi zyrtarisht në korrik 2024, pas urdhrit të Gjykatës së Lartë. Ndërkaq, në nëntor 2023, Gjykata Evropiane për të Drejtat e Njeriut në Strasburg e cilësoi ngjarjen si “krim shtetëror”, duke theksuar nevojën për hetim të thelluar.
Ngjarja e 21 Janarit mbetet një nga momentet më të dhimbshme dhe të diskutueshme të historisë së fundit politike në vend, dhe përplasjet mbi përgjegjësitë vazhdojnë të jenë në fokus të opinionit publik dhe të drejtësisë.