Ministri Durmishi për vizitë në Turqi, takim me ministrin e Tregtisë Omer Bollat: Fokusi ynë është forcimi i bashkëpunimit tregtar
Në kuadër të vizitës në Ankara, sot realizova takim me ministrin e Tregtisë së Turqisë Omer Bollat. Në takimin biseduam për marrëdhëniet tregtare dhe ekonomike midis Turqisë dhe Maqedonisë së Veriut, si dhe zhvillimin dhe thellimin e këtyre marrëdhënieve teksa u përqendrova edhe në mundësitë për bashkëpunim mes dy vendeve si dhe rritjen e investimeve turke në vendin tonë.
Në takim Ministrin Bollat e informova se Republika e Turqisë është ndër partnerët tanë më të rëndësishëm tregtarë dhe vend që vazhdimisht investon në ekonominë maqedonase në sektorë të ndryshëm si partner strategjik investues.
Gjithashtu, theksova se të dhënat për shkëmbimin tregtar tregojnë se Republika e Turqisë vitin e kaluar është renditur në vendin e 7-të në listën e vendeve me të cilat Republika e Maqedonisë së Veriut realizon vëllimin më të madh të shkëmbimit tregtar duke shpresuar që në periudhën e ardhshme ky bashkëpunim të thellohet edhe më tej.
Bashkërisht biseduam dhe u dakorduam për pjesëmarrjen më të madhe të ndërmarrjeve turke në projektet infrastrukturore dhe energjetike maqedonase në drejtim të rritjes së investimeve në Maqedoninë e Veriut.
