Shkëndija U18 në Danimarkë merr pjesë në turne për kremtimin e festës së 28 Nëntorit

Ekipi U18 i KF Shkëndija, i udhëhequr nga trajneri Taxhedin Kasami dhe drejtori i shkollës së futbollit të Shkëndijës, Erhan Selimi, ka udhëtuar drejt Kopenhagës, Danimarkë, për të marrë pjesë në një manifestim futbolli të organizuar për nder të festës kombëtare “28 Nëntorit”.

Pjesëmarrja në këtë turne është një mundësi e veçantë për lojtarët e rinj të klubit që, përveç përvojës ndërkombëtare, të nderojnë edhe festën e flamurit. Ekipi U18 është kombinuar me 7 futbollistë nga gjenerata U17, duke ofruar një përbërje konkurruese për ndeshjet e turneut.

“Kjo pjesëmarrje përkon me misionin tonë për t’u dhënë të gjitha gjeneratave të Shkëndijës mundësi për të përjetuar aktivitete ndërkombëtare, të cilat pasurojnë përvojën dhe zhvillimin e tyre. Përmes këtyre turneve, jo vetëm që po avancojmë profesionalisht, por edhe po nderojmë festat tona kombëtare. Krahas këtij turneu në Danimarkë, do të marrim pjesë edhe në një tjetër turne në Durrës me ekipin U11 i drejtuar nga trajneri Husein Kadriu më 29 nëntor. Me këtë rast dua që në emër të klubit dhe në emrin tim personal, t’ju uroj të gjithë shqiptarëve festat e nëntorit”, shprehet Erhan Selimi, drejtori i shkollës së futbollit të Shkëndijës.