Policia e Kosovës hyri në institucionet serbe në Graçanicë

Të mërkurën në mëngjes, Policia e Kosovës hyri në Postën e Serbisë dhe në komunën paralele të Prishtinës, e cila funksionon në Graçanicë që nga periudha pas luftës.

Para ndërtesës së Postës së Serbisë është vendosur një shirit i verdhë, ndërsa gazetarët e Radios Evropa e Lirë (RSE) raportojnë se aktualisht policët janë të stacionuar në këto dy institucione.

Degët e tjera të postës u mbyllën më 5 gusht të vitit të kaluar në veri të Kosovës, ku jeton shumica e serbëve – një veprim që u kritikua nga Bashkimi Evropian dhe Shtetet e Bashkuara të Amerikës, të cilët në atë kohë shprehën “zhgënjimin e thellë” dhe e quajtën aksionin të njëanshëm dhe të pakoordinuar.

Gjatë aksioneve të Policisë së Kosovës vitin e kaluar, u mbyllën edhe shumë institucione të tjera serbe. Këto veprime kanë vazhduar edhe këtë vit.