Zgjedhjet parlamentare në Kosovë: Ka filluar votimi i diasporës
Votimi për zgjedhjet parlamentare në Kosovë, të cilat janë caktuar për të dielën, më 9 shkurt, ka filluar sot në orën 07:00 në përfaqësitë e Kosovës në Evropë.
Votimi në përfaqësitë diplomatike dhe konsullore në SHBA dhe Kanada do të fillojë më vonë, në orën 13:00 sipas kohës së Evropës Qendrore.
Komisioni Qendror i Zgjedhjeve (KQZ) njoftoi në një konferencë për media se diaspora po voton në 43 qendra votimi në 16 ambasada dhe 14 konsullata të Kosovës, të vendosura në 19 vende të ndryshme.
Për të votuar në këto 30 përfaqësi diplomatike janë regjistruar gjithsej 20,324 votues.
Të drejtë vote në zgjedhjet për Kuvendin e Kosovës kanë 2,075,868 qytetarë, të cilët mund të votojnë në 941 qendra votimi dhe 2,533 vendvotime, njoftoi KQZ.
Në vetë Kosovën, të drejtë vote kanë 1,970,944 qytetarë, ndërsa në diasporë 104,924 persona.
KQZ, në bashkëpunim me Policinë e Kosovës, ka filluar sot shpërndarjen e materialeve zgjedhore për komisionet zgjedhore, të cilat në orët e vona të natës ose herët në mëngjes do t’i dorëzojnë në qendrat e votimit dhe vendvotime.
Janë shtypur gjithsej 1,752,650 fletëvotime, nga të cilat 1,664,100 janë destinuar për votimin në vendvotime të rregullta, 21,450 për votimin në përfaqësitë diplomatike, 28,450 për votimin me kushte dhe 38,650 për votimin e personave me nevoja të veçanta dhe fletëvotime rezervë.
Në zgjedhjet e nënta parlamentare në Kosovë, që nga shpallja e pavarësisë, marrin pjesë 28 subjekte politike, prej të cilave 19 parti politike, pesë koalicione, dy iniciativa qytetare dhe një kandidat i pavarur. Po ashtu, ka edhe gjashtë subjekte politike nga komuniteti serb.
Sipas sondazheve parazgjedhore dhe pritshmërive të analistëve politikë, beteja kryesore zgjedhore do të zhvillohet midis Lëvizjes Vetëvendosje të Albin Kurtit, Lidhjes Demokratike të Kosovës të Lumir Abdixhikut, Partisë Demokratike të Kosovës të Memli Krasniqit dhe Aleancës për Ardhmërinë e Kosovës të Ramush Haradinajt.
Kuvendi i Kosovës ka 120 vende parlamentare, nga të cilat 20 janë të garantuara për komunitetet pakicë. Komuniteti serb ka 10 vende, komuniteti boshnjak ka tre, komuniteti turk ka dy, komuniteti rom (RAE) ka katër, ndërsa komuniteti goran ka një vend parlamentar.
Pragu zgjedhor është 5%.
