Gjermania planifikon fonde miliardëshe për mbrojtjen dhe infrastrukturën

Partitë që po negociojnë për formimin e qeverisë së re gjermane po diskutojnë krijimin e dy fondeve speciale, një për mbrojtjen dhe një për infrastrukturën, me një vlerë të mundshme prej qindra miliarda eurosh. Sipas burimeve të Reuters, ekonomistët që këshillojnë partitë vlerësojnë se duhen rreth 400 miliardë euro për mbrojtjen dhe 400 deri në 500 miliardë euro për infrastrukturën.

Urgjenca për këto masa është rritur pas takimit mes presidentit ukrainas Volodymyr Zelensky dhe homologut të tij amerikan, Donald Trump, në Shtëpinë e Bardhë. Berlini synon të veprojë më shpejt për të forcuar mbrojtjen e tij dhe për të mbështetur Ukrainën në situatën e tensionuar të sigurisë në Evropë.

Bisedimet për qeverinë e re janë duke u zhvilluar mes tre partive kryesore: Unioni Kristian-Demokrat (CDU), Unioni Kristian-Social (CSU) dhe Partia Socialdemokrate (SPD) e kancelarit Olaf Scholz. Objektivi është që fondet të miratohen deri në mars, përpara formimit të qeverisë së re, që pritet të udhëhiqet nga Friedrich Merz.

Megjithëse ende nuk është marrë një vendim përfundimtar, palët po punojnë mbi detajet e fondeve. Përfaqësuesit e partive kanë refuzuar të komentojnë për shkak të konfidencialitetit të negociatave.