Ai qëlloi veten në kokë pasi kuptoi se ishte rrethuar nga policia – vdiq autori i vrasjeve të shumëfishta në Cetinje.

Ai qëlloi veten në kokë pasi kuptoi se ishte rrethuar nga policia – vdiq autori i vrasjeve të shumëfishta në Cetinje.
Sipas prokurores Andrijana Nastiq, e cila po e drejton hetimin për këtë rast, në Cetinje u vranë 12 persona dhe i dyshuari vrau veten. Hetimi u zhvillua në gjashtë lokacione, pesë prej të cilave janë vendet ku ndodhën vrasjet, ndërsa njëra është vendi ku i dyshuari qëlloi veten.

Aco Martinoviq, autori i vrasjeve të shumëfishta që ndodhën dje pasdite në një restorant në Cetinje, qëlloi veten në kokë pasi u rrethua nga policia. Ai vdiq rrugës për në Qendrën Klinike të Malit të Zi. Këtë mbrëmë, siç raportojnë mediat malazeze, e bëri të ditur drejtori i Drejtorisë së Policisë, Lazar Shkëpanoviq, duke theksuar se autori më parë ishte lokalizuar në lagjen Humci në Cetinje dhe vendi ku ai ishte fshehur ishte rrethuar nga forcat policore.

“Policia bëri një rreth rreth tij. Kur iu urdhërua të dorëzonte armën, ai qëlloi veten në kokë. Gjatë përpjekjes për ta transportuar në spital, ai nuk i mbijetoi plagëve”, tha ai.

Ai falënderoi familjen e zgjeruar të Martinoviqit, për të cilën shtoi se kishte ndihmuar policinë në gjetjen e vendndodhjes së autorit.

“Sipas tyre, autori kishte ndërprerje të caktuara në komunikim me të afërmit dhe miqtë, dhe të gjithë të vdekurit ishin kumbara, miq dhe shokë të tij me të cilët kalonte kohën. Motivet e këtij akti ende nuk dihen”, tha Shkëpanoviq.

Sipas tij, qytetarët duhet të heqin dorë nga paragjykimet dhe stereotipet dhe kur të shohin se dikush ka sjellje antisociale ose devijante, t’i njoftojnë me kohë për këto rrethana.

Ministri malazez i Punëve të Brendshme, Danilo Sharanoviq, tha se Martinoviq ishte izoluar përmes një operacioni të shpejtë policor.

“Kur e pa se ishte në një situatë pa rrugëdalje, ai u përpoq të vriste veten. Ai nuk vdiq menjëherë në vend, por gjatë transportit për në spital,” tha ministri.