Analiza: Si rritet paga minimale në vendet e rajonit?!
Sipas Eurostat, nga janari i vitit 2025, pagat minimale bruto mujore në BE variojnë nga 551 euro në Bullgari deri në 2.638 euro në Luksemburg. Kur përfshihen vendet kandidate, Moldavia ka pagën minimale më të ulët prej 285 eurosh. Në fakt, 22 nga 27 shtetet anëtare të BE-së kanë një pagë minimale kombëtare, ndërsa Danimarka, Italia, Austria, Finlanda dhe Suedia nuk e kanë atë. Prandaj, ky krahasim fokusohet në këto 22 shtete përbashkë me vendet kandidate ku ka të dhëna të disponueshme.
Eurostat kryesisht shqyrton gamën e pagës minimale në tre kategori:
Kategoria e parë: Mbi 1.500 euro në muaj
Në këtë grup përfshihen: Luksemburgu (2.638 euro), Irlanda (2.282 euro), Holanda (2.193 euro), Gjermania (2.161 euro), Belgjika (2.070 euro) dhe Franca (1.802 euro).
Pasi Belgjika nuk e rriti pagën minimale, Gjermania e kaloi atë. Ndërsa ky grup përfshin shtete me pagë minimale mbi 1.500 euro, vetëm Franca mbetet nën 2.000 euro. Të gjitha shtetet e tjera e kalojnë këtë prag, duke treguar se këto shtete po rrisin hendekun. Ndjekësi më i afërt, Spanja, ka një pagë minimale prej 1.323 eurosh.
Kategoria e dytë: Mes 1.000 dhe 1.500 euro
Spanja (1.323 euro), Sllovenia (1.254 euro), Polonia (1.091 euro), Lituania (1.038 euro), Portugalia (1.015 euro) dhe Qipro (1.000 euro) përbëjnë grupin e pagave “mesatare”. Në korrik 2024, ky grup përfshinte vetëm dy shtete, por me rritjen e fundit të pagës minimale, tani është zgjeruar ndjeshëm.
Kategoria e tretë: Më pak se 1.000 euro
Ky është grupi më i madh, që përbëhet nga 10 shtete anëtare të BE-së dhe të gjitha vendet kandidate. Mes tyre, Kroacia (970 euro), Greqia (968 euro), Malta (961 euro), Estonia (886 euro), Çekia (826 euro), Sllovakia (816 euro) dhe Rumania (814 euro) janë relativisht më të pozicionuara mirë, me një pagë minimale që e kalon 800 euro.
Mes shteteve kandidate, Turqia ka pagën minimale më të lartë prej 708 eurosh, duke kaluar dy shtete anëtare të BE-së – Hungaria (707 euro) dhe Bullgaria (551 euro).
Ndërsa, Maqedonia, për fat të keq, është thellë në fund dhe ka një pagë minimale prej 366 eurosh.
