Blerim Sejdiu: Koçani tregon ndryshimin në Drejtësi dhe Përgjegjësi

Shkrim i Kryetarit të Komunës së Zhelinës, Blerim Sejdiu:

Për fat të keq, tragjeditë e shumta që kanë goditur vendin tonë në vitet e fundit kanë lënë pas shumë dhimbje dhe humbje. Ndërkohë që në raste të tilla përgjegjësia shpesh është larguar nga ata që kanë vërtet faj, siç ndodhi me “Besa Trans” dhe “Durmo Turs”, ku gjithmonë u akuzua shoferi, tashmë, pas tragjedisë së fundit në Koçan, ka ndryshuar diçka. Për herë të parë, pas një tragjedie, po ndodhin arrestime, dhe disa ish-kryetarë komunash dhe individë të tjerë që deri tani ishin të paprekshëm, janë tani të përfshirë në hetime.

Në të kaluarën, drejtësia është vonuar dhe ata që vërtet kanë pasur përgjegjësi kanë shpëtuar. Shoferët, kabllot, dhe punëtorët e tjerë të pafajshëm kanë mbajtur peshën e fajit, ndërsa ata që janë përgjegjësit e vërtetë kanë vazhduar të jetojnë jetën pa pasoja. Më në fund, pas tragjedisë së Koçanit, është e qartë se drejtësia po bëhet më e fortë, dhe ata që kanë abuzuar me pushtetin do të japin llogari për veprimet e tyre.

Kjo është një ditë e rëndësishme për drejtësinë në vendin tonë. Pas shumë vitesh, po shohim që ata që janë përgjegjës për tragjeditë dhe dhimbjet që kanë prekur shumë familje, po mbajnë llogari. Kjo është një garanci për të ardhmen, që çdo humbje do të ketë një përgjegjës dhe drejtësia do të zbatohet siç duhet.