Deklarata | Jeton Beqiri komenton fitoren me Voskën
Kuqezinjtë falë golit të Florent Ramadanit (51’) marrin fitoren e 10-të sezonale, duke u shkëputur të vetmuar në vendin e parë në renditje. Trajneri Beqiri vlerëson tre pikëshin, duke qëndruar në bindjen se ekipi ka hapsirë të përmirësohet vazhdimisht.
…fitorja…
Jeton Beqiri: “Normalisht vlerë kanë vetëm tre pikët. Mua gjithmonë më pëlqen kur fitojmë pa gol të pranuar, pasi është një lloj stabiliteti. Nuk mund të flasim për futboll cilësore në kushte si këto të sotmet. Prandaj me rëndësi është që morëm tre pikët dhe vazhdojmë serinë e fitoreve.”
…Florent Ramadani sërish vendimtar…
Jeton Beqiri: “Normalisht Florenti është i shkëlqyeshëm sa i përket punës ekipore dhe stërvitet me shumë profesionalizëm. E dija se për lojtarë të llojit të Florentit, Qakës e Kërstevskit më shumë do të kemi nevojë në pjesën e dytë. Dmth gjithçka ishte e planifikuar dhe ashtu doli. Florenti është një nga mesfushorët që ka kapacitet të shënojë shumë gola, i rrallë në kampionatin e Maqedonisë apo edhe jashtë vendit.”
…ndaj Gostivarit kemi në dorë titullin vjeshtor…
Jeton Beqiri: “Janë të rëndësishme pikët që fituam. Kemi 4 fitore me radhë dhe kjo ka rëndësi. Kemi shkuar në kuotën e 36 pikëve dhe për momentin unë merrem vetëm me pikët dhe fitoret, sepse vetëm këto mbahen mend, kurse loja dhe gjithçka tjetër do të harrohen që nesër. Normal ne kemi probleme në lojë, kemi edhe probleme fizike, kemi edhe disa probleme që kanë të bëjnë me përshtatjen e lojtarëve. Më vjen keq dhe turp të marrim pjesë në ndeshje ku fusha nuk plotëson as kushtet minimale për lojë. Kurse ne përforcimet dhe futbollistët që sjellim janë lojtarë që gjithë karrierën e tyre kanë luajtur në fusha shumë të mira dhe këtu adaptimi shkon jashtëzakonisht keq. Mbase duhet të pyetemi në këto kushte dhe këto fusha çfarë futbollistësh duhet të sjellim. Adaptimi është shumë i vështirë në kushte kur duhet të mendosh kur topi kërcen, nuk ke kurfarë qetësie. Kështu në këto kushte pavarësisht cilësisë, në fushë gjithë futbollistët dhe gjitha ekipet në këto kushte duken shumë të barabartë.”
