“Diçka e madhe do të ndodhë nesër në mbrëmje“: Trump publikon një mesazh misterioz

Presidenti amerikan, Donald Trump, ka publikuar një mesazh misterioz në rrjetin e tij social Truth Social, ku ka paralajmëruar se gjatë natës mes të martës dhe të mërkurës do të ndodhë “diçka e madhe”, sipas mediave rajonale.

“Diçka e madhe do të ndodhë nesër në mbrëmje. Do ta them ashtu siç është”, ka shkruar Trump. Deklarata e tij ka shkaktuar një sërë spekulimesh, veçanërisht për faktin se ai pritet të mbajë një fjalim në seancën e përbashkët të Kongresit.

Sipas mediave, presidentët amerikanë zakonisht mbajnë fjalimin për gjendjen e kombit pas të paktën një viti në detyrë, por Trump ka vendosur ta bëjë këtë më herët.

Republikani Mike Johnson ka deklaruar për “Fox News” se presidenti zakonisht nuk do të mbante një fjalim të tillë në këtë fazë të mandatit të tij, por se gjithsesi do të jetë një “Fjalim për gjendjen e kombit”, duke theksuar se Trump “e ka vendosur Amerikën mbi baza më të forta”.

Më herët, Trump ka shkruar në rrjetin e tij: “Presidenti i vetëm që nuk i dorëzoi asnjë pëllëmbë të Ukrainës Rusisë, Putinit, është Donald J. Trump. Mbajeni mend këtë kur kritikohen demokratët e dobët dhe joefektivë, ndërsa mediat publikojnë gjithçka që ata thonë”.

Ky mesazh ka nxitur edhe më shumë spekulime mbi atë që mund të jetë “surpriza e madhe” që ai ka paralajmëruar.