Gjermanisë i duhen punëtorë të huaj, dhe digjitalizimi do të përshpejtojë procesin

Ministria e Jashtme e Gjermanisë do të digjitalizojë një pjesë të madhe të procesit të lëshimit të vizave nga viti 2025. Qëllimi kryesor është të sjellë sa më shpejt forcën punëtore të kualifikuar ose të paktën të mos dekurajohen nga burokracia para se të mbërrijnë.

Komentet në forumet online të personave që kërkojnë vizë për Gjermani nuk duken shumë motivuese: “Është jashtëzakonisht e vështirë edhe të caktoni një takim”, shkruan një student nga Maroku në platformën “Reddit!”. “Tmerr” shton një tjetër. Një kandidat i tretë ofron një këshillë: gjithçka i shkoi pa probleme kur dërgoi një email në ambasadën gjermane ku lavdëroi “vendin e mrekullueshëm me kulturë të pasur, peizazhe të bukura dhe mikpritje të ngrohtë”.

Prandaj, sipas Baerbock, një “revolucion” i vërtetë do të jetë kalimi i Ministrisë së Jashtme në një proces digjital nga viti 2025. Digjitalizimi i vizave konsiderohet si një nga projektet e saj të preferuara dhe në mënyrë të papritur do të bëhet një nga reformat e fundit të kësaj qeverie.

Ministria përpunon mesatarisht 2.3 milionë kërkesa për vizë në vit. Një pjesë e këtyre kërkesave – që po shënojnë rritje të madhe – tani do të digjitalizohet. “Numri i aplikacioneve për viza kombëtare afatgjata është rritur ndjeshëm,” thotë Clemens Kone, komisioneri special për digjitalizimin e vizave në Ministrinë e Jashtme.
Çdo vit shqyrtohen pothuajse 500,000 aplikacione, për shembull për profesionistë, studentë ose për bashkim familjar. “Qëllimi ynë është të përpunojmë sa më shumë prej tyre përmes portalit për shtetasit e huaj,” shpjegon Kone.

Portali për shtetasit e huaj (Das Auslandsportal) është një faqe e re në internet e lidhur me 167 zyra të vizave gjermane në mbarë botën.