Ky qytet europian është shpallur më i shtrenjti në botë

Zvicra është e njohur për shumë gjëra, duke përfshirë peizazhet e bukura alpine, vendpushimet dimërore, traditat e bërjes së orës, çokollatën dhe një përzierje unike kulturash dhe gjuhësh. Por ai vend europian njihet edhe për koston e lartë të jetesës.

Sipas raportit të bazës së të dhënave online Numbeo, Gjeneva është shpallur edhe një herë qyteti më i shtrenjtë në botë. Në përgatitjen e atij raporti, janë marrë parasysh kostot e sendeve ushqimore, qirasë, vakteve në restorant dhe kostoja totale e jetesës. Nju Jorku u përdor si pikënisje me 100 pikë.

Gjeneva shënoi 101.7, duke e bërë atë 1.7 për qind më të shtrenjtë se Nju Jorku. Megjithatë, kjo nuk do të thotë se të gjitha shërbimet në këtë qytet zviceran janë më të shtrenjta. Në fakt, Numbeo zbuloi se indeksi i kostos së banesave në Gjenevë është 59.6, ose 40 për qind më i ulët se ai i Nju Jorkut. Nga ana tjetër, sendet ushqimore janë shtrenjtuar me 11.4 për qind, ndërsa në restorante me 1.5 për qind.

Në vitin 2021, çmimet e konsumit në Zvicër ishin 54 për qind më të larta se ato në Bashkimin Evropian. Por nga ana tjetër, në të njëjtin vit, sipas të dhënave zyrtare, qytetarët zviceranë mund të kursenin rreth 15 për qind të të ardhurave të tyre vjetore.

Një pjesë e asaj që e bën Gjenevën kaq të shtrenjtë është se qyteti është shtëpia e selive të disa organizatave globale, si zyra ndërkombëtare e Organizatës Botërore të Shëndetësisë, selia evropiane e Kombeve të Bashkuara dhe Organizata Evropiane për Kërkime Bërthamore (CERN). .

Përveçse është më i shtrenjti, është e rëndësishme të theksohet se Gjeneva renditet vit pas viti si një nga qytetet më të mira në botë për të jetuar. Në fillim të këtij viti, ajo u barazua për vendin e pestë me Calgary në Indeksin prestigjioz vjetor të Jetesës Globale të EIU, me rezultate perfekte në kategoritë e shëndetit dhe arsimit.

Një tjetër qytet zviceran, Cyrihu, zuri vendin e dytë në shkallën e kostos së jetesës Numbeo, me një rezultat të përgjithshëm prej 100.4. Cyrihu njihet si qendra financiare e Zvicrës dhe është qyteti më i populluar i vendit, ka një indeks më të ulët të kostos së banesave se Nju Jorku me 46.5 për qind, por sendet ushqimore atje janë më të shtrenjta.

Nju Jorku është në vendin e tretë, i ndjekur nga San Francisko dhe Bostoni është i pesti në listën e qyteteve më të shtrenjta në botë.