Protesta e opozitës në Tiranë do të sigurohet nga të paktën 1500 policë

 Opozita shqiptare, e drejtuar nga Partia Demokratike, me protestën kombëtare të planifikuar për mbrëmjen e sotme, në orën 18:00, në Tiranë, me moton “Marshimi drejt Tiranës – tani ose kurrë”, siç ka paralajmëruar, nis mosbindjen civile.

Në letrën që Partia Demokratike i ka dërguar policisë, kërkohet leje katër orëshe për tubimin, nga ora 18:00-22:00. Ky dokument specifikon vetëm lejen e protestës para qeverisë. Organizatorët paralajmërojnë “vetëm marshime, por jo fjalime” dhe atë nga selia e PD-së, përmes sheshit “Heroi Narodni” e deri në qeveri.

Të paktën 1500 punonjës policie, nga të gjithë sektorët, përfshirë njësinë e dislokimit të shpejtë “Shliponja”, do të jenë në krye të sigurisë së protestës. Në gatishmëri do të jenë edhe forcat e njësisë speciale “Renea” për të ndërhyrë në rast të ndonjë incidenti.

Depozitat me ujë do të vendosen pas godinës së qeverisë dhe në disa pika të tjera pranë institucioneve ku pritet të kalojnë pjesëmarrësit e protestës. Do të ketë edhe zjarrfikëse dhe ambulanca.

Drejtori i Policisë së Shtetit, Ilir Proda, u kërkoi forcave të policisë që të mos bien nën ndikimin e provokimeve të mundshme të protestuesve dhe të ndërhyjnë vetëm në rast nevoje.

“Kujdes të mos provokoheni nga protestuesit. Ndërhyrjet duhet të minimizohen vetëm në rast nevoje, shmangni përplasjet e provokuara. Ruajtja e qetësisë dhe mbrojtjes së objekteve të institucioneve. Regjistroni dhe dokumentoni të gjitha aktet e dhunshme dhe të paligjshme”, thuhet në urdhrin e Prodës.

Në thirrjen e fundit të kryedemokratit, Sali Berisha, i cili ndodhet në paraburgim, thuhet se kjo do të jetë beteja më e rëndësishme civile në 32 vitet e fundit.