Qeveria kufizoi marzhet për mbi 1000 produkte
Qeveria mori vendim për kufizimin e marzhës së fitimit bruto (MFB) në tregtinë me shumicë dhe pakicë, si dhe vendim për përcaktimin e çmimeve më të larta për produkte të caktuara në këto tregti.
Siç informoi në konferencën e sotme për shtyp zëvendësministri i Ekonomisë dhe Punës, Marjan Risteski, me qëllim mbrojtjen e standardit jetësor të popullatës, respektivisht uljen e shpenzimeve për jetesë në shportën e konsumit për ushqime dhe pije, si dhe për produktet e higjienës personale, Qeveria ka marrë vendim për kufizimin e marzhës në tregtinë me shumicë dhe pakicë për 102 grupe produktesh ose mbi 1000 produkte ushqimore dhe jo-ushqimore.
Konkretisht:
- MFB prej 5% për tetë produktet ushqimore bazë: qumësht, bukë, miell tipi 400 dhe 500, vezë, vaj ushqimor, kos dhe qumësht i thartë;
- MFB prej 10% për një grup prej 55 produktesh ushqimore: mish dhe produkte të përpunuara nga mishi, sheqer, produkte të qumështit, margarinë, gjalpë, perime dhe fruta të konservuara, fasule, oriz dhe makarona;
- MFB prej 15% për 39 produkte ushqimore dhe produkte higjienike: fruta dhe perime të freskëta, detergjentë, ushqime për foshnja, pelena, sapun, letër higjienike etj.
- Analiza e Inspektoratit Shtetëror të Tregut (DPI) tregoi se tregtarët me shumicë dhe pakicë aplikojnë marzhë nga 20 deri në 25% për produktet bazë në tregtinë me pakicë dhe nga 20 deri në 50% në tregtinë me shumicë. Me këtë vendim, të gjithë pjesëmarrësit në tregtinë me shumicë dhe pakicë duhet të sigurojnë që të paktën 70% e këtyre 102 grupeve të produkteve të jenë të pranishme në rafte, tha ministri Risteski.
Ai shtoi se është marrë edhe një vendim për përcaktimin e çmimeve më të larta për tetë grupet e produkteve ushqimore bazë në tregtinë me shumicë dhe pakicë, ku çmimet më të larta janë përcaktuar sipas nivelit të zbatuar më 1 shkurt 2025.
- Të dy vendimet do të hyjnë në fuqi një ditë pas botimit në Gazetën Zyrtare dhe do të jenë të vlefshme deri më 30 prill. Pritet që këto vendime të çojnë në një ulje mesatare prej rreth 10% të çmimeve të produkteve ushqimore bazë, përveç tetë produkteve bazë – qumësht, bukë, miell tipi 400 dhe 500, vezë, vaj ushqimor, kos dhe qumësht i thartë – të cilat pritet të mbeten në të njëjtin nivel ose të kenë një ulje minimale, tha Risteski.
Ai sqaroi se kanë marrë propozime nga tregtarët dhe distributorët dhe se bazuar në analizën e Ministrisë dhe të dhënat nga DPI, këto vendime do të ndihmojnë në stabilizimin dhe uljen e çmimeve të produkteve ushqimore bazë, si dhe në mbrojtjen e standardit jetësor të qytetarëve, të paktën deri më 30 prill, kur shënohen dy festa të mëdha fetare – Pashkët dhe Ramazani.
- DPI do të jetë aktivisht i angazhuar në terren, dhe në rast të shkeljeve, do të aplikohen gjoba rigoroze deri në 20,000 euro, theksoi Risteski.
Në lidhje me pyetjet e gazetarëve, ai sqaroi se kanë marrë mbi 20 propozime dhe kanë dëgjuar si tregtarët me pakicë dhe shumicë, ashtu edhe disa distributorë. Disa nga propozimet janë pranuar, por vendimet e Qeverisë mbi marzhat janë marrë bazuar në analizat e DPI-së.
