Treni i ri kinez “fluturon” me 450 km/orë
Sipas raportit të China State Railway Group Co., modeli i ri, i njohur si prototipi CR450, do të shkurtojë më tej kohën e udhëtimit dhe do të përmirësojë lidhjen, duke e bërë udhëtimin më të rehatshëm dhe më efikas për numrin e madh të pasagjerëve në vend.
Sipas China Daily, prototipi CR450 arriti një shpejtësi testimi prej 450 km/orë, me treguesit kryesorë të performancës – shpejtësia e punës, konsumimi i energjisë, zhurma e brendshme dhe distanca e frenimit – duke vendosur një standard të ri ndërkombëtar, raportuan mediat zyrtare kineze.
Ky model është dukshëm më i shpejtë se treni i shpejtë CR400 Fuxing, i cili aktualisht është në përdorim dhe lëviz me një shpejtësi deri në 350 km/orë, sipas raportit të agjencisë shtetërore të lajmeve Xinhua. Hekurudhat kineze kanë kryer një sërë testimesh të prototipeve në pista dhe optimizime të treguesve teknikë për të siguruar që CR450 të hyjë në përdorim komercial sa më shpejt të jetë e mundur.
Sipas të dhënave të fundit zyrtare, linjat operative të trenave të shpejtë në Kinë kanë arritur rreth 47,000 kilometra, duke lidhur qytetet kryesore në të gjithë vendin.
Edhe pse nuk është fitimprurëse, Kina pretendon se zgjerimi i rrjetit të hekurudhave të shpejta ka luajtur një rol kyç në zhvillimin ekonomik dhe social të vendit, duke zvogëluar kohën e udhëtimit dhe duke nxitur zhvillimin industrial përgjatë linjave hekurudhore.
Sipas kërkimeve të brendshme, trafiku hekurudhor midis Pekinit dhe Shangait ka qenë më fitimprurës, ndërsa trafiku në qytete të tjera ende nuk është bërë fitimprurës.
