Zëvendëskryeministri i parë, Izet Mexhiti: Partneriteti me bizneset është kyç për zhvillimin ekonomik të vendit
Shkup, 16 janar- Zëvendëskryeministri i parë i Maqedonisë së Veriut, Izet Mexhiti, mori pjesë në ngjarjen “Dita e Hapur” të organizuar nga Oda Ekonomike e Maqedonisë Veri-Perëndimore, ku theksoi rëndësinë e bashkëpunimit të ngushtë ndërjet qeverisë dhe komunitetit të biznesit për zhvillimin ekonomik të vendit.
Në fjalimin e tij, Mexhiti shprehu falënderime për kryetarin e Odës, Mendi Qyra, drejtorin e Agjencisë për Investime të Huaja dhe promovim të Eksportit, Refik Xhemaili si dhe përfaqësuesit tjerë të lartë të institucioneve, duke nënvizuar masat konkrete të ndërmarra nga qeveria për të krijuar një klimë të favorshme për bizneset. Ai theksoi se synimi kryesor i këtyre masave është zhvillimi i një ekonomie dinamike, konkurruese dhe të qëndrueshme, duke u përqendruar në fuqizimin e sipërmarresve dhe thithjen e investimeve të huaja.
“Qeveria ka ndërmarrë hapa të rëndësishëm për mbështetjen e bizneseve dhe nxitjen e investimeve.
Një nga masat kyç është krijimi i linjës kreditore prej 250 milionë eurosh nga Hungaria, e cila ofron kushte ndër më të favorshmet në rajon, duke u mundësuar bizneseve qasje të lehtë në financim pa diskriminim. Fillimi i ndërtimit të Korridorit 8-të është një injeksion i madh financiar për kompanitë lokale dhe do të krijojë mundësi të reja përfitimi për të paktën 48 muajt e ardhshëm”, deklaroi Mexhiti.
Gjithashtu, sipas Mexhitit qeveria aktuale ka përmirësuar politikën fiskale, duke ulur taksat për bizneset e vogla dhe të mesme, si dhe duke ofruar mbështetje financiare për sipërmarresit e rinj. Këto përfitime përfshijnë grante, kredi me kushte të favorshme dhe stimuj për eksportet, duke forcuar ndërkombëtarizimin e produkteve vendase.
Fokusi në reformat në gjyqësor dhe sigurinë e investimeve
Mexhiti theksoi gjithashtu rëndësinë e një sistemi të drejtë dhe të pavarur gjyqësor si një element thelbësor për krijimin e një klime të favorshme për bizneset.
“Varësia e pushteteve të ndryshme nga politika ka ndikuar negativisht në klimën e biznesit në të kaluarën. Ne po punojmë për reformimin e gjyqësorit dhe pavarësimin e tij nga politika dhe politikanët. Vetëm në një ambient të tillë mund të sigurojmë zhvillim të lirë ekonomik dhe investime të qëndrueshme,” tha ai.
Thirrje për bashkëpunim dhe dialog të hapur
Duke u drejtuar përfaqësuesve të biznesit, Mexhiti nënvizoi se qeveria është gjithmonë e hapur për dialog dhe bashkëpunim. Ai inkurajoi komunitetin e biznesit të parashtrojë pyetje, të ndajnë shqetësimet dhe pritshmëritë, duke theksuar që sukseset ekonomike arrihen vetëm me një partneritet të sinqertë mes institucioneve shtetërore dhe sektorit privat.
“Jemi këtu për të ndëgjuar zërint tuaj dhe për të punuar së bashku për zhvillimin e një ekonomie të qëndrueshme dhe konkurruese për vendin tonë,” përfundoi Mexhiti.
