Zv/kryeministrja dhe ministre e Infrastrukturës dhe Energjisë, Belinda Balluku, vizitoi kantierin e Autostradës Tiranë-Durrës, ku punimet kanë përparuar dukshëm. Ajo vlerësoi se ky kantier është ndër më të mirët në të gjithë vendin.
“Jemi tashmë në fazën e dytë të punimeve. Faza e parë arriti një progres të qëndrueshëm prej 65%, ndërsa faza e dytë ka përparuar deri në 80%,” tha Balluku, duke shprehur besimin se autostrada mund të dorëzohet para festave të fundvitit.
“Edhe pse afati zyrtar është shtatori i vitit 2026, jemi afër përfundimit të pjesës së fundit prej 200 metrash, pranë mbikalimit të Kasharit. Po punojmë për trasenë e re dhe shpresojmë ta dorëzojmë rreth 9 muaj para afatit,” shtoi ajo.
Ministrja nënvizoi se 6 kilometrat e parë të autostradës, nga “Casa Italia” deri te mbikalimi i Kasharit, tashmë janë të tipit A, me një gjerësi prej 32.5 metrash, duke siguruar standarde të larta për sigurinë dhe lëvizjen në këtë segment rrugor.
