PRISHTINË – Kryetari i Aleancës për Ardhmërinë e Kosovës (AAK), Ramush Haradinaj, ka lëshuar akuza të rënda ndaj kryeministrit Albin Kurti lidhur me menaxhimin e sektorit të energjisë në vend. Përmes një reagimi publik, Haradinaj e ka cilësuar bilancin e qeverisë si një dështim të plotë në realizimin e premtimeve për pavarësi energjetike dhe zhvillim ekonomik.
Haradinaj ka theksuar se pas më shumë se pesë viteve në pushtet, qeveria Kurti po fshihet pas retorikës për të kaluarën për të mbuluar mungesën e rezultateve aktuale.
“Albin, kur nuk ke rezultate, flet për të kaluarën… Por qytetarët e Kosovës nuk jetojnë në vitin 2018. Qytetarët jetojnë në vitin 2026. Dhe pas pesë-gjashtë viteve të qeverisjes sate, bilanci është i qartë”, ka shkruar Haradinaj në rrjetet sociale.
Shifrat e deficitit dhe varësia nga importi
Sipas kreut të AAK-së, Kosova vazhdon të mbetet një importuese neto e energjisë elektrike dhe ende mbështetet pothuajse tërësisht në termocentralet e vjetra me linjit, të ndërtuara para më shumë se pesë dekadash. Për të ilustruar gjendjen, Haradinaj ka renditur disa të dhëna zyrtare:
-
Deficiti energjetik (2024): Sipas Energy Community, Kosova prodhoi rreth 6,059 GWh energji elektrike, por konsumoi rreth 6,611 GWh, duke krijuar një mungesë prej mbi 550 GWh.
-
Mungesa e kapaciteteve në kulm (2025): Kërkesa maksimale (në peak) arriti në rreth 1,600 MW, ndërsa kapaciteti operativ i vendit ishte vetëm rreth 1,241 MW.
-
Mungesa e investimeve: Gjatë kësaj periudhe nuk është ndërtuar asnjë termocentral i ri, asnjë central me gaz dhe asnjë kapacitet tjetër bazik prodhues.
Fatura marramendëse e importit: 652 milionë euro më shumë
Akuza më e fortë e Haradinajt lidhet me koston financiare që po paguajnë qytetarët për blerjen e energjisë nga jashtë, duke bërë një krahasim me periudhat e kaluara qeverisëse:
| Periudha Kohore | Shuma e Shpenzuar për Import |
| 01.01.2015 – 31.12.2020 (Para qeverisë Kurti) | Mbi 270 milionë euro |
| 01.01.2021 – 31.03.2026 (Gjatë qeverisë Kurti) | Mbi 923 milionë euro |
