Mbështetja për presidentin amerikan Donald Trump ka rënë në 38 për qind, niveli më i ulët që nga rikthimi i tij në Shtëpinë e Bardhë në janar. Një sondazh i Ipsos për Reuters tregon se pakënaqësia më e madhe e amerikanëve lidhet me mënyrën si po trajton krizën e kostos së lartë të jetesës dhe çështjen e Jeffrey Epstein.
Sipas medias së njohur, ndikimi i Trumpit brenda Partisë Republikane po tregon shenja dobësimi. Të dyja dhomat e Kongresit kanë urdhëruar Departamentin e Drejtësisë të publikojë dosjet mbi Epstein, të dënuar për krime seksuale. Dhoma e Përfaqësuesve miratoi masën me shumicë dërrmuese (427-1), ndërsa Senati e përshpejtoi atë unanimisht.
Lëvizjet pasuan pasi Trump ndryshoi qëndrimin dhe kërkoi nga Kongresi të zbulojë të dhënat pas kundërshtimeve publike. Javën e kaluar, lidhjet e tij me Epstein u rikthyen në titujt kryesorë të lajmeve me publikimin e mbi 20,000 faqeve dokumente, disa prej të cilave përmendnin presidentin.
Sondazhi online tregon se mbështetja për Trumpin ka rënë me dy për qind krahasuar me sondazhin e fillimit të nëntorit, duke e çuar popullaritetin e tij pranë nivelit më të ulët gjatë mandatit të parë dhe afër vlerësimit më të dobët të paraardhësit të tij, Joe Biden, që ishte 35 për qind.
