Shitja e alkoolit dhe cigareve në Greqi vetëm me paraqitjen e kartës së identitetit për mbrojtjen e të miturve
Përforcimi i masave dhe rregulloreve ligjore përmes rritjes së kontrollave dhe shitjes së alkoolit dhe cigareve vetëm me paraqitjen e kartës së identitetit, parashikohet në projekt-ligjin e ri të Ministrisë së Shëndetësisë të Greqisë, me qëllim mbrojtjen e të miturve nga produktet duhanore dhe alkoolike, raportoi korrespondentja e MIA-s nga Athina.
Ky projekt-ligj u prezantua në mbledhjen e sotme të qeverisë, dhe për rëndësinë e tij foli edhe kryeministri grek, Kyriakos Mitsotakis, në fillim të takimit.
- Qëllimi ynë është të sigurohemi që pijet alkoolike të shiten vetëm me paraqitjen e kartës së identitetit, siç bëhet në vendet e huaja. Posaçërisht përgjegjës do të jetë shitësi, pavarësisht nëse ai është tregtar apo shërben në një lokal gastronomik, dhe ndëshkimet do të jenë të ashpra, tha Mitsotakis.
Siç bëri të ditur zëdhënësi i qeverisë, Pavlos Marinakis, në mbledhjen e sotme të qeverisë, ministri i Shëndetësisë dhe zëvendësministri e prezantuan projekt-ligjin që parashikon krijimin e një mekanizmi efikas kontrolli për të parandaluar aksesin e të miturve në alkool, duhan dhe produkte të ngjashme, përmes futjes së kontrolleve të detyrueshme të kartës së identitetit nga shitësi në të gjitha pikat e shitjes, si dhe vendosjen e ndëshkimeve të rrepta administrative në rast të shkeljes së masës.
