Dodik: Bosnja dhe Hercegovina nuk ekziston më, kërkojmë marrëveshje me Vuçiçin
Presidenti i Republikës Sërpska, Milorad Dodik, në një miting në Banja Luka deklaroi se Bosnja dhe Hercegovina nuk ekziston më dhe bëri thirrje për një marrëveshje me presidentin serb, Aleksandar Vuçiç. Ai gjithashtu sulmoi ashpër komunitetin ndërkombëtar dhe institucionet e drejtësisë në BiH, duke akuzuar gjykatësit për korrupsion dhe vendime të padrejta kundër serbëve.
Dodik theksoi se Republika Sërpska do të mbrojë Kushtetutën me policinë dhe sistemin e saj të drejtësisë, duke refuzuar juridiksionin e institucioneve shtetërore të Bosnjës. Ai shtoi se shumë shpejt Kuvendi do të vendosë për ndalimin e Prokurorisë dhe Gjykatës së Bosnjës dhe Hercegovinës në territorin e entitetit serb.
Duke bërë thirrje për mbështetje popullore, Dodik tha se ka biseduar me presidentin serb, Vuçiç, dhe kryeministrin hungarez, Viktor Orbán. Ai kërkoi nga Vuçiç që të vijë në Banja Luka për të diskutuar hapat e ardhshëm, duke lënë të kuptohet se Republika Sërpska po përgatitet për veprime të mëtejshme politike dhe ligjore kundër autoriteteve qendrore të Bosnjës dhe Hercegovinës.
