Skuadra e Bashkimit shkaktoi befasi në xhiron e 6-të të Ligës së Parë të Futbollit të Maqedonisë, duke e mposhtur Sileksin deri dje të pamposhtur me rezultat 2-1 në Kumanovë. Me këtë fitore, Bashkimi i dha fund serisë prej pesë triumfesh të kratovasve dhe shënoi fitoren e tretë sezonale.
Vendasit kaluan në epërsi me golin e Avornjos në minutën e 21-të, ndërsa vetëm tetë minuta pas fillimit të pjesës së dytë, Aleksoski e dyfishoi avantazhin në 2-0. Në minutën e 60-të Zuka u ndëshkua me karton të kuq, dhe Bashkimi u detyrua të luajë me një lojtar më pak. Vetëm tre minuta më pas, portugezi Miguel Pires shënoi për Sileksin duke ngushtuar shifrat në 2-1.
Megjithatë, përpjekjet e mysafirëve për të marrë së paku një pikë nuk dhanë rezultat dhe u desh të pajtohen me humbjen e parë këtë sezon.
Në ndeshjen tjetër të ditës, skuadra e Maqedonia GjP në Gjorçe Petrov arriti fitoren e parë para tifozëve të vet, duke mundur AP Brerën nga Strumica me 2-0.
Rezultatet e deritanishme – Xhiroja e 6-të:
-
E martë
-
Bashkimi – Sileksi 2-1
-
Maqedonia GjP – AP Brera 2-0
-
-
E mërkurë
-
Tikveshi – Shkupi
-
Struga Trim Lum – Shkëndija
-
-
E enjte
-
Arsimi – Vardari
-
Rabotniçki – Pelisteri
-
