Çairi Investon në Arsim: Shkolla “Liria” Pajiset me teknologji moderne, përgatit nxënësit për të ardhmen digjitale
Kryetari i Komunës së Çairit, Visar Ganiu, mori pjesë në një ngjarje të rëndësishme për shkollën fillore “Liria”, ku u njoftua një donacion i madh për përmirësimin e infrastrukturës digjitale të shkollës. Donacioni prej 1.200.000 denarësh, siguruar nga Agjencia për Komunikime Elektronike (AEK), ka mundësuar furnizimin me pajisje moderne, përfshirë kompjuterë, laptopë, smart tabela dhe printerë.
Kjo iniciativë ka si qëllim krijimin e një kabineti të avancuar të informatikës, që do t’u ofrojë nxënësve mundësi për të zhvilluar aftësi teknologjike në përputhje me kërkesat e kohës dhe për të përgatitur ata për sfidat e një tregu gjithnjë e më të dixhitalizuar.
Kryetari Ganiu falënderoi drejtoreshën e shkollës, Teuta Idrizi, për angazhimin e saj dhe Agjencinë për Komunikime Elektronike për kontributin e çmuar. Ai theksoi se Komuna e Çairit është e përkushtuar në avancimin e infrastrukturës arsimore dhe krijimin e një mjedisi modern dhe inovativ për nxënësit.
Ky investim është një hap i rëndësishëm për përmirësimin e kushteve të mësimdhënies dhe për forcimin e përgatitjes së brezit të ri për sfidat e të ardhmes.
