Raporti i ri i progresit i Bashkimit Evropian ka vënë sërish nën lupë gjendjen e drejtësisë në Maqedoninë e Veriut, duke konstatuar se sistemi gjyqësor vazhdon të përballet me dobësi të thella strukturore. Dokumenti thekson se mungesa e pavarësisë, ndikimi politik dhe korrupsioni i lartë vazhdojnë të frenojnë funksionimin normal të gjykatave dhe prokurorive, çka ka rritur ndjeshëm mosbesimin e qytetarëve ndaj institucioneve të drejtësisë.
Vlerësimet kritike kanë ringjallur debatin publik, duke sjellë reagime nga komuniteti akademik, organizatat e shoqërisë civile dhe aktorë politikë që prej kohësh paralajmërojnë për stagnimin e reformave.
Ndër komentet më të spikatura dallon ai i profesorit të së drejtës penale, Gordan Kalajxhiev, i cili prej vitesh është ndër zërat më kritik ndaj mënyrës së funksionimit të gjyqësorit. Ai u shpreh ashpër lidhur me raportin, duke theksuar se vendi ka një problem të thellë me kulturën e dënimeve automatike.
“Gjykatat tona janë të gatshme të dënojnë edhe një ari pa prova. Mbi 90 për qind e të akuzuarve përfundojnë të dënuar – ndërsa politikanët vazhdojnë t’i fajësojnë gjykatat për të kundërtën,” deklaroi Kalajxhiev.
Sipas tij, ky disproporcion i madh midis akuzës dhe vendimeve për dënim është tregues i mungesës së kontrollit të brendshëm, transparencës dhe fqinjësisë politike që cenon pavarësinë institucionale.
Këto zhvillime vijnë në një moment kur BE kërkon rezultate të matshme në fushën e sundimit të ligjit, sektor që mbetet një ndër pengesat kryesore për avancimin e vendit në procesin e integrimit evropian.
