Këshilli i BE-së sot vendosi të zgjasë regjimin e masave kufizuese ndaj personave, veprimet e të cilëve kërcënojnë sovranitetin, integritetin dhe sigurinë e Bosnjës dhe Hercegovinës edhe për dy vjet deri më 31 mars 2026, njoftoi korrespondenti i MIA-s nga Brukseli.
Me këtë vendim, Bashkimi Evropian do të mund të vendosë sanksione kundër individëve ose subjekteve që cenojnë sovranitetin, integritetin territorial, rendin kushtetues dhe karakterin ndërkombëtar të Bosnjë-Hercegovinës dhe që kërcënojnë seriozisht situatën e sigurisë në vend ose minojnë Marrëveshjen e Paqes të Dejtonit. .
Të sanksionuarve në këtë regjim u ngrihen asetet në BE dhe ndalohet vënia në dispozicion e fondeve dhe përveç kësaj, personave fizikë u ndalohet hyrja në Bashkim.
Vendimi për vendosjen e një regjimi të masave kufizuese në lidhje me situatën në Bosnje dhe Hercegovinë u mor më 21 mars 2011.
