Kombëtarja e Kosovës e ka zhvilluar seancën e radhës stërvitore para ndeshjes miqësore me Armeninë në “Republican Stadium” në Yerevan. Edhe në këtë seancë stërvitore përveç ambientimit të lojtarëve me fushën, përzgjedhësi Franco Foda pjesën më të madhe të kohës ia ka kushtuar aspektit taktik. Të gjithë lojtarët janë në gjendje të mirë dhe të gatshëm për lojë, teksa atmosfera brenda ekipit është pozitive, ku synohet që kjo fazë e re të nisë me fitore.
Paraprakisht në konferencën me media përzgjedhësi i Kosovës, Franco Foda tha se Kosova në miqësoren e nesërme do të luajë që nga fillimi lojë sulmuese.
“Kemi pasur seanca stërvitore shumë të mira në Prishtinë, edhe pse koha nuk ka qenë aq e përshatshme. Sidoqoftë, ekipi është në gjendje të mirë. Armenia dhe Kosova kanë lojtarë shumë të mirë sidomos teknikisht dhe që të dyja kanë paraqitje solide. Në tri ditët e fundit jemi koncentruar në aspektin taktikë. Do të luajmë në mënyrë sa më agresive dhe të sulmojmë sa më shpejt”, ka thënë Foda.
Ai ka folur edhe për gjendjen fizike të lojtarëve. “Kemi bërë stërvitje të mira në Prishtinë dhe jemi përgatitur mirë. Rrahmani dhe Rashica kishin probleme të vogla muskulore, por që i kanë kaluar dhe janë gati për ndeshje”, ka shtuar Foda.
Në anën tjetër, sulmuesi Vedat Muriqi ka thënë se ekipi është i përgatitur mirë për dy ndeshjet si fizikisht, ashtu edhe mentalisht, derisa ka vlerësuar se Kosova është favorite kundër Armenisë. “Ndonëse janë ndeshje miqësore, është shumë e rendësishme të fitojmë dhe të mësohemi me fitoret. Besoj që Kosova është favorite për ndeshjen e nesërme. Individualisht por edhe si ekip do ta demostrojmë që jemi më të mirë”, ka theksuar Muriqi.
Do theksuar se para ndeshjes me Armeninë, përzgjedhësi Foda ka paraparë edhe një seancë stërvitore të premten paradite.
