Kryeministri i Shqipërisë, Edi Rama, priti sot në selinë e Kryeministrisë kryetarin e Bashkisë së Nju-Jorkut, Eric Adams, në një takim ku u diskutuan çështje të rëndësishme lidhur me zhvillimin ekonomik, turizmin dhe komunitetin shqiptar në SHBA.
Në një deklaratë të përbashkët për mediet pas takimit, Rama theksoi rëndësinë e vendosjes së një linje direkte fluturimi midis Tiranës dhe Nju-Jorkut, duke shtuar se kjo do të mundësojë udhëtime më të lehta për shqiptarët që jetojnë në SHBA dhe do të sjellë përfitime ekonomike për kompanitë e transportit ajror.
“Folëm për nxitjen që ju doni të bëni për të përshpejtuar atë që ne po e diskutojmë aktualisht me Aviacionin Federal të SHBA-së për një linjë direkte nga Nju-Jorku, që do të ishte e jashtëzakonshme, pasi do të sillte përfitime të mira për kompanitë dhe do të inkurajonte më shumë shqiptarë të udhëtojnë nga SHBA,” deklaroi Rama.
Kryeministri vlerësoi lidhjet e forta të Adams me komunitetin shqiptar dhe përvojën e tij në vendosjen e linjave direkte me vende të tjera, duke e konsideruar kryebashkiakun një mik të kahershëm dhe partner të besueshëm.
“Pas një premtimi të përsëritur disa herë, kryetari i Bashkisë së Nju-Jorkut, Adams, më në fund erdhi në Shqipëri për të vizituar nga afër vendin tonë dhe për të diskutuar për turizmin dhe bashkëpunimin teknologjik,” tha Rama, duke shtuar se Adams është shumë i interesuar për zhvillimin e teknologjisë dhe për takimin me ekspertët shqiptarë.
Takimi nënvizon rëndësinë e bashkëpunimit mes Shqipërisë dhe qyteteve kryesore të SHBA-së, si dhe përpjekjet për të fuqizuar lidhjet ekonomike, turistike dhe kulturore.
