Komisioni për Politikë dhe Demokraci i Asamblesë Parlamentare të Këshillit të Evropës miratoi dje raportin për Kosovën, i cili hap rrugën për hapat e ardhshëm drejt anëtarësimit në këtë Këshill.
Kryeministri i Kosovës, Albin Kurti, e ka cilësuar këtë një arritje të madhe për Kosovën, për të cilën është mburrur se është bërë një punë e madhe, raportojnë mediat kosovare .
Kreu i qeverisë së Kosovës ka theksuar se ky është një lajm i mirë për Evropën, pasi sipas tij, Rusia do të jetë jashtë dhe Kosova brenda.
“Është një hap i madh për Kosovën, për atë që qeveria e Kosovës ka bërë dy vite e gjysmë pa u ndalur, më në fund kjo pranverë tregon se do të kurorëzohet me sukses, ky është vetëm hapi i parë i pranverës. Hapi i radhës do të jetë në mesin e muajit prill kur do të votohet Kuvendi Parlamentar, hapi i fundit është në Këshillin e Ministrave në maj”, tha Kurti.
“Përveç kësaj, për Evropën, për kombin shqiptar, për demokracinë, është një lajm shumë i mirë që në këtë epokë gjeopolitike dhe historike, Federata Ruse është jashtë, dhe Kosova është brenda, është një njohje dhe mirëkuptim i madh për qytetarë të vendit tonë”, tha Kurti.
