Protestat në Sarajevë, urimet e politikanëve pro-serbë dhe pro-rusë nga rajoni dhe njoftimet për një fjalim të ri nxitës të Dodik janë pritjet e deritanishme nga ngjarja që do të zhvillohet pasnesër në Bosnje dhe Hercegovinë.
Presidenti i entitetit boshnjak Republika Srpska, Milorad Dodik, më 9 janar planifikon të organizojë një festë të asaj që ai thotë se është dita e themelimit të Republikës Srpska. Protestat në Sarajevë, urimet e politikanëve pro-serbë dhe pro-rusë nga rajoni dhe njoftimet për një fjalim të ri nxitës të Dodik janë pritjet e deritanishme nga ngjarja që do të zhvillohet pasnesër në Bosnje dhe Hercegovinë.
Qindra qytetarë në Sarajevë u mblodhën dje në protestën kundër festimit të 9 janarit në entitetin Republika Srpska. Protesta u organizua nga Forumi Rinor i shoqatës së intelektualëve të pavarur “Rrethi 99”. Protesta filloi para Bašcharšija dhe përfundoi para presidencës së BeH, ku të mbledhurit kujtuan se Gjykata Kushtetuese e Bosnjës e shpalli ditën e Republikës Srpska një festë jokushtetuese.
Pjesëmarrësit e protestës kërkuan përgjigje adekuate nga autoritetet boshnjake ndaj kremtimit të paralajmëruar të ditës antikushtetuese në Republika Srpska, shkruan gazeta Danas. Ndryshe, Gjykata Kushtetuese e Bosnjës në tri raste ka vendosur që Dita e Republikës Srpska është jokushtetuese, ndërsa Komisioni i Venecias e ka shpallur festën e saj diskriminuese.
Milorad Dodik u bëri ftesa politikanëve pro-serbë në rajon për të marrë pjesë në ngjarjet në Republika Srpska që do të organizohen nga udhëheqja atje më 9 janar. Ftesën për të marrë pjesë e ka refuzuar presidenti malazez Jakov Milatoviq, ndërsa sot reagim të ngjashëm ka ardhur edhe kryetari i Kuvendit të Malit të Zi, Andrija Mandiq.
Mandiq tha se më 9 janar kishte një festë familjare dhe për këtë nuk do të udhëtonte në Banja Luka. Megjithatë, Andrija Mandiq nga Cetinja ka uruar Milorad Dodik dhe popullin serb për ditën e themelimit të Republikës Srpska, shkruan gazeta Podgorica Pobjeda.
Ndërkaq, presidenti serb Aleksandar Vuçiq, në kartonin e sotëm të Krishtlindjeve drejtuar qytetarëve të Serbisë, nuk ka munguar të përmend edhe banorët e Republikës Srpska dhe të Kosovës. Në mesazhin e tij, Vuçiq tha se askush nuk mund ta shfuqizojë Republikën Srpska, shkruan gazeta Oslobodzenje.
Në të njëjtën kohë, në mesazhin e tij për Krishtlindje, Vuçiq ka uruar edhe 9 janarin – ditën e Republikës Srpska.
“Gëzuar festën të gjithëve, veçanërisht popullit tonë të vuajtur të Kosovës dhe Metohisë dhe popullit tonë në Republika Srpska që pasnesër feston festën dhe ditën e tyre”, tha Vuçiq.
Meqë ra fjala, 9 janari është një datë e diskutueshme për boshnjakët dhe kroatët në Bosnje dhe Hercegovinë. Dita e themelimit të Republikës Srpska përfaqëson datën e fillimit të luftës në BeH, si dhe fillimin e spastrimit etnik, krimeve të luftës dhe gjenocidit ndaj popullsisë joserbe në Republika Srpska. Kjo festë kontestohet nga BE dhe Zyra e Përfaqësuesit të Lartë në BiH, pasi është shkelje e kushtetutës së Bosnjës dhe Marrëveshjes së Dejtonit.
