Patate të skuqura të aromatizuara me proshutë të tymosur do të ndalohen në të gjithë Bashkimin Evropian pasi Agjencia Evropiane e Sigurisë Ushqimore (EFSA) zbuloi se shijet e njohura të tymit artificial mund të shkaktojnë probleme serioze shëndetësore.
Gjegjësisht, Agjencia Evropiane ka bërë të ditur se shija e tymit është e lidhur me gjenotoksicitetin, përkatësisht aftësinë e kimikatit për të dëmtuar materialin gjenetik të qelizave, transmeton “Index” kroat.
“Ndryshimet ose mutacionet në informacionin gjenetik në qelizë mund të rrisin rrezikun e zhvillimit të kushteve të tilla si kanceri dhe sëmundjet trashëgimore”, shpjegojnë ata.
Në fund u konkludua se “me këtë lloj toksiciteti nuk mund të përcaktohet një nivel i sigurt aromash”, kështu që në fund të muajit prill u mor vendim për ndalim total. Sigurisht, ndalimi i shitjes së patate të skuqura me shije proshutë nuk do të ndodhë brenda natës. Periudha e përshtatjes do të zgjasë dy vjet në vendet anëtare të BE-së.
“Pas periudhës së largimit, ato aromatizues nuk do të lejohen më për përdorim në BE”, tha EFSA.
Jo vetëm patate të skuqura
Pra, vendet anëtare të BE-së ranë dakord në heshtje për një ndalim në fund të prillit dhe aromatizuesit e tymit do të hiqen plotësisht gjatë disa viteve të ardhshme në të gjithë Evropën.
Por kjo nuk do të ndikojë vetëm tek patatet e skuqura, pasi këto aromatizues shtohen shpesh në mish, djathë, peshk dhe salca të tilla si salca e Barbecue.