Kandidati për kryetar të Komunës së Likovës nga koalicioni VLEN, Nexhmedin Sadiku, njoftoi mbylljen përfundimtare të deponisë në fshatin Nikushtak, pas 24 vitesh neglizhencë nga qeverisjet e kaluara. Ai theksoi se, gjatë viteve, edhe pse BDI-ja kishte pushtetin lokal dhe qendror, deponia vazhdonte të helmonte vendbanimet përreth.
“Pas një viti punë të përbashkët, ne e mbyllëm këtë deponi, duke treguar përgjegjësi dhe vendosmëri”, deklaroi Sadiku. Ai falënderoi zëvendëskryeministrin Arben Fetai, ministrin Izet Mexhiti dhe banorët për aktivizimin dhe vetëdijen e lartë, të cilët kontribuan në ndalimin e kamionëve që mbushnin deponinë.
Sadiku shtoi se ky është vetëm një hap drejt zgjidhjes së problemeve të komunitetit dhe se me mbështetjen e Qeverisë dhe një udhëheqjeje të re lokale, sfidat e tjera do të adresohen një nga një.
